3 Karakteristikat Kryesore të një Sipërmarrësi të Vërtetë
Sipërmarrja nuk është për të gjithë. Nuk është një rrugë e drejtë, e sigurt dhe e shtruar. Përkundrazi, është një udhëtim me kthesa, me sfida dhe me vendime që shpesh duhen marrë pa pasur të gjitha përgjigjet gati. Por pikërisht kjo e bën sipërmarrësin një figurë unike. Ai nuk ndjek rrugën e zakonshme – ai krijon një të re.
Le t’i hedhim një sy tre karakteristikave më të rëndësishme që dallojnë një sipërmarrës të vërtetë.
1. Dashuria për rrezikun
Një sipërmarrës nuk kënaqet me gjërat e thjeshta. Nuk është nga ata që zgjedh rrugën e sigurt vetëm për të qenë rehat. Ai dashuron rrezikun – jo atë të verbërin si në ruletë, por rrezikun e llogaritur, të mbështetur mbi intuitë, mbi ide dhe mbi bindje të forta.
Kur të tjerët stepin, sipërmarrësi bën hapin përpara. Për të, çdo rrezik është një mundësi. Dhe shpesh, pikërisht këto mundësi të marra me guxim janë ato që hapin dyert e suksesit.
2. Inovacioni – sfidimi i status quo-së
Një tjetër tipar i pandashëm i sipërmarrësit është inovacioni.
Sipërmarrësi nuk pranon rregullat e vendosura vetëm pse kanë ekzistuar gjithmonë. Ai i vë në dyshim, i sfidon, i trazuar gjithmonë nga dëshira për të bërë diçka më ndryshe, më mirë, më të thjeshtë ose më efektive.
Për të, çdo ditë është një shans i ri për të “trazuar letrat”, për të sjellë ide që nuk janë menduar më parë dhe për të shtyrë kufijtë e asaj që konsiderohet normale. Inovacioni është oksigjeni i sipërmarrjes.
3. Aftësia për të normalizuar – dirigjenti i orkestrës
Një sipërmarrës nuk është thjesht një individ me ide të mëdha. Ai është normalizuesi – njeriu që arrin të mbajë së bashku kompetenca, mendësi, stile dhe njerëz të ndryshëm.
Në një ekip ka gjithmonë dallime: dikush është më teknik, dikush më kreativ, dikush më i përpiktë, dikush më spontan. Sipërmarrësi është ai që arrin t’i vërë të gjitha këto në harmoni, ashtu si një dirigjent që udhëheq një orkestër.
Ai krijon balancë, i bën gjërat të funksionojnë bashkë dhe e kthen kaosin në një mekanizëm që ecën drejt së njëjtës vizion.
Përfundim
Sipërmarrësi është rrezikdashës, inovator dhe dirigjent i energjive të ndryshme. Ai nuk është thjesht një individ me ide, por një forcë që sjell lëvizje, ndryshim dhe frymëzim.
Dhe ndoshta, pikërisht këto tre tipare – dashuria për rrezikun, inovacioni dhe aftësia për të bashkuar – janë çelësat që i japin sipërmarrësit fuqinë të ndërtojë botën e tij, dhe shpesh, të ndikojë në botën e të tjerëve.
Gerhard Dibra une Jam Fuqia Ime
